''نوَّرت مصر"

دى أول جملة بتتقال لأى واحد مش مصرى أول مابيدخل من مطار القاهرة ومن الطريقة اللى بتتقال بيها بيحس الراجل اللى مش مصرى ده إنها ترحيب بيه مع إنه ممكن مايكونش فاهمهاو"الله المصريين دول طيبين أوى" !!
سيبكوا من المطار بقى دلوقتى وتعالوا ندخل على الشوارع ونشوف الناس اللى عايشه فمصر دى عامله إزاى!
حنكتئب شويه بس يا رب نوصل لحل فى الآخر!
الشوارع زحمة جداً طول النهار والليل ...وكأن مافيش مرور عندناوطبعاً كل الشوارع ينفع فيها الإتجاهين عادى جداً....وأى حد ممكن يلف فأى وقت يمكن من غير مايدى إشارة ولو حد إتهور وفكر يرجع بضهره شبر حيلاقى نفسه فوق "إكسضام" العربيه اللى وراه وينزل كمان يتخانق مع الراجل اللى كان وراه ولاكأنه عمل حاجه ولا دى كانت غلطته أصلاً وبرضو مافيش ظابط بيكلف خاطره ويشوف فيه إيه !!
تعالوا بقى بصوا على النيل والحاجات اللى مرميه فيه حتعرفوا ليه فى ناس كتير الكلى عندها تعبانه!
من الحاجات الغريبه عندنا إن بقى فيه فرق فى الطبقات غريب وملحوظ أوى مكانش موجود من 6 سنين فاتت، فجأه بقى فى ناس أغنياء جداً وفى ناس مش لاقيه تاكل أو يدوب قادرة تعيش أما الطبقة المتوسطة فبدأت تتلاشى تقريباً ...والناس الأولنيين مش حاسين بالناس التانيين   .
وده بيخلينى أسأل نفسى هو فى ناس واخده حقوق ناس تانيه ولا إيه؟؟ طبعا انتو عارفين الإجابه!!
وكل حاجه عمَاله سعرها يزيد ماعدا مرتبات الموظفين "محلّك سر" زى ماهيه يعملوا إضراب.. يعملوا إعتصام ..."لاحياة لمن تنادى"
نتكلم عننا إحنا الشباب شويه "بسم الله ماشاء الله لاشغله ولا مشغله" ماليين القهاوى والسيبرات أو قاعدين عالفيس بوك في البيت يعنى
مش كلنا طبعاً فى اللى بيحاول يحسن نفسه فى اللغات والكمبيوترأو حتى بيحضر دراسات عليا وبيدور على شغل وأكييد ربنا مش حيضيع تعبنا وحيرزقنا أكيد بشغلانه كويسه غير برضو اللى قاعد ومستنى حد يجيبله شغل.
بس المشكله إن كل المصريين نفسهم ومنى عينهم يسيبوا مصر ويسافروا عشان متخيلين إنهم لوسافروا أى بلد تانيه حيملكو الدنيا وحتى اللى ربنا بيسهله وبيقدره إنه يثبت نفسه بره بيضيع قدام ده كله سنين كتييييرمن عمره بيقضيها لوحده و لوقدر يكون أسرة بره وإستقر بيبقى فى المقابل قطع خيوط كتيركانت بتوصله بكل الناس اللى بيحبهم هنا .
مش عارفه يعنى دى وجهة نظرى يمكن فى ناس الكلام ده مايفرقش معاهم! إحتمال برضو!
بس اللى أنا متأكده منه إن مافيش حد يحب إنه يحصله أى ظرف ويلاقى نفسه فجأه لوحده!
وبعدين انا ماسيبش مصر أبداً حتى لو هى مش عايزانى أنا قاعدة على قلبها برضو، عشان انا شايفه إن مصر منورة بأهلها ، عارفه إن حالتها متدهورة فحاجات كتيييييير من هنا لبكره بس أحوالها مش حتتحسن إلا بينا لما كل واحد فينا يفكر هو يقدر يعمل إيه كويس ليها ساعتها حتنوربجد .
طبعاًحتقولولى: : "بتحلمى" أو يمكن تسألونى "إزاى؟"
حقولوكوا لو رعينا ربنا فشغلنا ولو مقدرتش أنا اشتغل يبقى ورايا مهمه أكبر هى ولادى اللى كل واحد فيهم لازم يبقى عارف هوعايز يعمل إيه و ناوى يصلح فإيه بالظبط وده مش هيحصل إلا لوفكرنا إحنا عايزين نعلِّمهم إيه !! عشان يبقالهم لازمه ويبقوا ناس محترمه ونحس إننا قدرنا نحط "شمعه" حتى بلاش "لمبه".
عرفتوا بقى إزاى مصر ممكن تنور! بإيدنا نقدر نعمل كل حاجه بس عشان خاطر ربنا فكروا إزاى تنوروها بجد مش تسيبوها وتمشوا واللى تجيله فرصه إنه يسافر مافيش مشكله يسافر بس يبقى حاطط هدف معين قدامه يحققه ويرجعلنا فوراً.... وميخليش الغربه تسرقه مننا عشان أكيد إحنا محتاجينه معانا هنا.
فى مقوله بتقول: "تفائلوا بالخير تجدوه"... خليكوا دايماً فاكرينها مهما كترت المشاكل.
ومين عارف مش يمكن كمان 15سنة كده الأجانب وهما داخلين من المطار يقولولنا " نورتوا مصر" ........
.........."منورين والله " :))))