جربت مرة تبقى قاعد فوسط ناس كتير وكلهم يعرفوا بعض وكلهم بيتكلموا فنفس الوقت ؟؟!!
عارف (ه)هتحس (ى) بإيه ؟........هتحس(ى) إنك نفسك تقوم تقف وتمسك أى حاجه تخبط بيها على الحيطه عشان تقولهم : لوسمحتم 5 دقائق ريست.... إرحموا نفسكوا شوية ...مش كدة!! زى ماكان المستر بيقول زمان فى الفصل ...بس حتى لما كان يحاول يسكتنا لازم كان يطلعله أى حد يزهقه فحياته طول الحصة ومايبطلش كلام .
نرجع للناس الكتيير اللى فى الأول...ساعتها حتلاقى نفسك مضطر تشترك فى أحدى هذة الثنائيات أو الثلاثيات اللى غالباً بيتكلموا فموضوع مش مهم بالنسبالك .. يا فى السياسه ...يا عن الحكومة... أوعن أى مشكلة من المشاكل اللى مابتخلصش....ولو القاعده فيها أمهات يبقى حتتحول أوتوماتيك إلى برنامج "لكِ يا سيدتى" و كلام عن الأكلات العجيبة اللى بتيجى فى التليفزيون مؤخراً....وعلى الجانب الآخر قاعدة شباب زى الفل وبرنامج " الكوره مع شوبير" واللى فيه أستوديو تحليلى لأى مباراة فاتتك وكان نفسك تشوفها ...أما عن الجانب البناتى فأهلاً بيك معانا فبرنامج " طلباتك إيه 100 مسا على القناة الخامسة" وكله فاتح البلوتوث والجو ملبد بأحدث الرنات اللى أكييد ماسمعتش عنها ولا حتسمع إلا لو قعدت معاهم ...... و طبعاً لو إتهورت وقولت أنا حستأذن بقى عشان ورايا أى حاجة لأنك غالباً بتكون حتموت وتنام.....حتلاقى مالا يقل عن 4 أيادى بتشدك وبيقولولك لأ لسه بدرى خليك قاعد معانا شوية......حاله من الرغى المتواصل المنقطع النظير...وكأنها عدوى بينهم كل واحد بيتكلم ومعندوش وقت يسمع طبعاً.....لإنه بيفكر حيتكلم فى إيه تانى أو حيرد يقول إيه على اللى قدامه.
**على فكرة كتر الكلام مابقاش عند الستات بس ....( حقولها وأنا مش مبسوطه !!) بقى فيه رجالة لاكاكه جداً ودى حاجة غير مبشره على الإطلاق... مش بقولوكوا عدوى!! :)
بما إنى بتعلم إيطالى اليومين دول فدايماً الميس بتقولنا :
"Basta Chiaccherate" اللى بتتنطق (باستا كياكيراتيه) يعنى كفاية كلااااام
أصلاً الكلمة لوحدها رغايه وبتتكلم مع نفسها :))...أنا حمشى بقى عشان ماتقولوش إنى بتكلم كتيير:) سلاااااااام
هناك تعليقان (2):
انا يسرا برضو احب انصح الشباب ان الرغي الكتير لايفيد
أهلاً أهلاً ... ده التليفزيون نوَّر والله :))
بس ماقولتيش إنتى بتحبى أنهى برنامج!!
ولا أقولك إنتى أكييد بتحاولى تمشى زيي وبيقعدوكى أنا متأكدة :))
إرسال تعليق