لو كل واحد فينا بص حواليه حيلاقى فى دايرة كبيره أوى مليانه ناس كلهم نعرفهم وبيحبونا بس يمكن مافيش حد عنده وقت يصنف الناس دى صح ويعرف بقى مين صاحبه ومين معرفته ومين قريبه ومين ومين.......!!
وكل مرحله فحياتنا بنقابل فيها ناس منهم اللى بيكمل معانا ومنهم اللى يقولك خلاص خلصت الشغلانه...وكل واحد يشوف حاله ويدخل على المرحلة اللى وراها ويقابل ناس تانيه بس وبعديين.....حيلاقى نفسه خلّص كل المراحل وكلهم سابوه ومشيوا.
ساعات بقى ممكن الواحد يلاقى نفسه فوسط مجموعه بيحبهم وهم كمان بيحبوه....بس بيحس إنهم مش بيشوفوه إلا لما يكون فى مشكلة أو فيه أى حاجه حصلت وساعتها الواحد ده بياخد باله من ده كله طبعاً ....فيقول لنفسه خلينى لوحدى احسن لا أضايق حد ولا حد يضايقنى ويرجعوا الناس يقولوا "هو مالو متغير ليه اليومين دول ومبقاش بيتكلم زى الأول!! "
مع إن الواحد ده أول مابتحصل اى حاجة للناس دى بينسى كل حاجه ويحاول يعمل أى حاجه لفلان ده حتى لو كان مزعله ومزعله أوى كمان....ولو حد فكّر يسأل الواحد ده مالك كده متغير!!....يبتسم الواحد و يقول: لا مافيش حاجه زهقان بس شويه ماتشغلش بالك.
أصل مش كل حاجه تنفع تتقال ولا بالمشاورة حتى فى حاجات كده بتتحس بس من غير كلام ،يمكن فى ناس معندهاش مشكله وممكن تتكلم فكل حاجه ..... بس هو طبيعته كده ماينفعش يتغير للناس!!
وحنا ماشيين فى الدنيا ممكن نقابل ناس ونفتكر إن هم دول اللى ينفعوا صحاب بجد وفجأة نكتشف إننا كنا غلطانين ومش هم دول خالص ....ولللأسف بنعرف الكلام ده بعد مدة طبعاً ونزعل شوية أيام كتييييير كده وبتعدى الأيام لحد مانلاقى الناس الصح اللى كنا بندوَّر عليهم .
وبعد مرور وقت ممكن نسرح ونفتكر الأيام دى ونقول :يااااه أنا كنت غلطان لما فكرت إن فلان ممكن يبقى صاحبى إزاى أنا كنت سايب نفسي معاه كده بس زى مابيقولوا "مراية الحب...إيييه!!... عاميه ...برافو عليكو".....بس الواحد صاحبكوا "عقبال عندكوا كدة" كسرها 600 حته خلاص من زمان أوى.
نفس الحكايه بتحصل مع المتجوزين مش الصحاب بس....يقال إن قبل الجواز بيبقوا حاجه وبعد الجواز بيبقوا حاجة تانيه خالص بس أنا مش مقتنعه بالكلام ده الصراحه.
طب هاحيلكواعلى حاجه مرة كنت بتكلم مع ست كبيره فبتقولى فترة الخطوبه دى كلها تمثيل وبتتكلم جد جداً وكأنها بتنصحنى يعنى!! .....وكان ردى عليها: " ليه بس ده الواحد يبقى على طبيعته أسهل من إنه يمثل دور مش بتاعه " سكتت الست الحقيقة وتقريباً أنا أحرجتها بس والله من غير ماقصد ...الكلام إستفزنى مش أكتر.
وكلام فى سرّكوا اللى بيقول كلمه مش بتاعته بتبقى باينه أوى ...يبقى ليه الواحد يضحك على نفسه يعنى !!...عشان اللى قدمه يعجب بيه مثلاً !!....ماشى وبعدين!....مسيره حيزهق من الدور ده وحيبقى نفسه....إحتمال يكون ده اللى بيحصل بعد الجواز عشان كده بيقولوا بعد الجواز كل حاجه بتتغير..... لكن بيتهيألى أنه بتظهر مؤشرات ففترة الخطوبه بس إحنا اللى بنعديها قاصدين...
والمأساه بتبدأ لما حد يدى للتانى كل حاجه ويحس إن اللى قدامه ده كل حياته والتانى مش بيفكر بنفس الطريقه ....والمأساه الأكبر إن الراجل أو الست بيكتشف ده لما يكون ياعينى جاب عيال وإدَّبس خلاص أو إدَّبست يعنى.
علماء علم النفس بيقولوا إن فيه نوعين من الشخصيات: شخصية إنبساطية وشخصية إكتئابية
الشخصية الإنبساطية دى مرحه أوى وبتحب تهرَّج وأول ماتدخل مكان تحس إنها ملياه حركه وعامله جو يعنى.
أما الشخصية الإكتئابية فحساسة شويتين تلاته و بتزعل من أقل حاجه واللى يعرفها لازم يحاسب وهو بيتعامل معاها وعشان كده لازم تتجوز اللى يحبها أكتر عشان يستحملها.
بس أنا شايفه إن كلنا فينا الشخصيتين مافيش حد فرحان على طول ولا حد زعلان على طول واللى هيحب حد أكيد هيستحمله فكل حالاته وإلا يبقى بيتهيأله إنه بيحب ودى تبقى سكة إعجاب وماعتقدش إن آخرها جواز ...يعنى مالهاش لازمه من الآخر.
** إحنا كلنا فعلاً محتاجين نقف شويه كده ونبص حوالينا مين ينفع يكمِّل ومين ماينفعش ومانشغلش بالنا بقى بحاجات عدت وكل مانفتكرها نضايق عشان ماترجعناش لورا وماتبوظش علينا حاجات حلوة كتيير ربنا رزقنا بيها دلوقتى .
ملحوظة (VIP): إوعوا تنسوا تكسروا المراية ........حتى لو كان شكلها حلو أكييد الحقيقة أحلى :))
ليست هناك تعليقات:
إرسال تعليق